İran Suriyadakı silah-sursatın bir qismini Ermənistana ötürə bilər.

Qeyd edək ki, Əsəd rejiminin devrilməsindən sonra İranda Suriyada silahlarının taleyi qeyri-müəyyən qalıb.

Qərb mətbuatına görə, İran silahları Livandakı “Hizbullah” qruplaşmasına göndərilib.

Bır sıra erməni və farsdilli teleqram kanallarında yayılan məlumatlara görə, İran hakimiyyəti Suriyadakı silah arsenalının bir hissəsini Ermənistana göndərməyi planlaşdırır. Hətta belə bir iddialar dolaşır ki, silahların Ermənistana göndərilməsi ilə bağlı Tehran və İrəvan arasında razılıq əldə olunub.

Xatırladaq ki, Tehranın Ermənistanı dəstəkləməsi yeni bir hadisə deyil. Tehran hər zaman regionda anti-Azərbaycan siyasəti yürüdüb.

Son 30 il ərzində İran Ermənistana həm iqtisadi, həm enerji, həm də hərbi dəstək verib.

Maraqlıdır, belə bir halın baş verəcəyi təqdirdə Azərbaycan hansı zəruri addımlar atacaq?

Məsələ ilə bağlı politoloq Elçin Xalidbəyli “Cebheinfo.az”-a şərhində qeyd edib ki, İranın Ermənistanı silah-sursatla təmin etməsi İrəvanın əleyhinə işləyəcək:

“İranın Ermənistanın silahlandırılması prosesində iştirak etməsi ilə bağlı yayılan məlumatlar yeni bir hadisə deyil. Əvvəllər də belə bir məlumatlar yayılıb.

Əgər İranın Suriyadakı silahlarının bir qismi Ermənistana ötürülməsi barədə yayılan məlumatlar doğrudursa, bu, Tehranın ermənipərəst və anti-Azərbaycan siyasətini davam etdirdiyi anlamına gələcək. Onsuzda İran hakimiyyəti bu siyasətini davam etdirir.

Əslində İranın hərbi-siyasi və dini rəhbərliyi heç bir zaman Ermənistana və Azərbaycana yönələn ənənəvi siyasətindən əl çəkməyəcək. Ümumi götürdükdə, İran Suriyadakı silahlarının bir qismini Ermənistana ötürsə belə, bu silahların İrəvana hər hansı fayda gətirəcəyi inandırıcı görünmür.

İran, Fransa və digər ölkələr Ermənistanı müasir silah-sursatla təmin edə bilər, amma nəzərə almaq lazımdır ki, Ermənistan Azərbaycanla silahlanma yarışında rəqabət aparmaq iqtidarında deyil. Ermənistanın elə güclü iqtisadi və maliyyə resusrları yoxdur ki, Azərbaycanla rəqabət apara bilsin.

Əslinə baxanda, Ermənistanın silahlanması onun özünə ciddi təhlükə yaradır. Rəsmi Bakı dəfələrlə bəyan edib ki, Ermənistan silahlanaraq Azərbaycana təhlükə yaradarsa, Azərbaycan sakit durub seyr etməyəcək və adevkat cavab tədbirləri görəcək.

Hesab etmək olar ki, İranın Ermənistanı silah-sursatla təmin etməsi İrəvanın xeyrinə yox, əleyhinə işləyəcək. İrəvan nə qədər silahlanacaqsa, Azərbaycan daha yüksək səviyyədə silahlanacaq və Ermənistana cavab zərbələri endirəcək”.