İctimai Televiziya və Radio Yayımları Şirkətinin (İTV kanalı) efirində yayımlanan “Əqrəb mövsümü” serialında vəkillərlə bağlı səsləndirilən ifadələr hələ də müzakirə edilir. Serialda sözügedən peşə sahiblərinin təhqir olunması onların ciddi etirazlarına səbəb olub. Hətta kanaldan, o cümlədən yaradıcı heyətdən üzr tələb edilir.

Məsələ ilə bağlı Globalinfo.az bir neçə vəkilə sorğu ünvanlayıb.

Vəkil Əlibaba Rzayev deyib ki, təhqirə şərait yaradan şəxslər məsuliyyətə cəlb olunmalıdırlar:

“Məlum görüntülər qarşıma çıxmayıb. Lakin efirdə açıq şəkildə təhqir etmək həm etik, həm də qanunvericilik baxımından doğru deyil. Hətta mülki qaydada yox, cinayət işinin açılması ilə bağlı məhkəməyə müraciət edilməlidir. Yaradıcı heyətlə yanaşı, təhqiramiz ifadənin səsləndirilməsinə göz yuman kanal rəhbərliyi də cavab verməlidir”.

Vəkil Zibeydə Sadıqova bildirib ki, cəmiyyətdə bütün peşə sahiblərinə qarşı nalayiq ifadələr işlədilir:

“Düzdür, bu, televiziyalarda olmamalı, maarifləndirici məlumatlar yayılmalıdır. “Əqrəb mövsümü”nə prokurorluq dəstək verdiyi halda, insanların müdafiə hüququ təşviq olunmur…Prokurorluq və digər qurumlar obyektiv, vicdanlı orqan kimi göstərilsə də, vəkil barəsində təhqiramiz ifadələr səsləndirilir?!”.

Vəkil Elçin Sadıqov isə qeyd edib ki, serialda səsləndirilən fikirlər tamamilə yolverilməzdir:

“Bu, vəkillərin cəmiyyətdə nüfuzunun aşağı salınmasına yönəlmiş bir addımdır. Vəkillik bir peşədir, hansısa vəzifə deyil. Biz xalqın hüquqlarının keşiyində qalırıq. Ona görə də vəkillərin gözdən salınması doğru hesab olunmamalıdır”.

Xatırladaq ki, sözügedən serialın 08.02.2025-ci il və 15.02.2025-ci il tarixlərində yaymlanan bölümlərində film personajının dildən səsləndirilən “oğraş vəkil” ifadəsi narazılıq yaradıb.