Ermənistanda Nikol Paşinyanı nüfuzdan salmaq və istefasına nail olmaq məqsədilə ictimai müstəvidə planlı qarayaxma kampaniyası genişlənir. Təkcə bir gün ərzində həm mediada, həm də müxtəlif siyasətçilərin dilindən bu vəziyyətə dəlalət edən kifayət qədər aydın bəyanatlar səslənib.

Məsələn, müxalif “Ermənistan” blokunun deputatı Artur Xaçatryan mayın 13-də parlamentdə çıxış edərək, İrəvanla Bakı arasında gedən danışıqlar prosesini belə şərh edib: “Ermənistanın xarici işlər naziri Ararat Mirzoyan bu yaxınlarda dedi ki, “yaxşı xəbərlər gözləyirik”. İndi isə divanda oturub “bəxtinin açılacağını” gözləyir”.
Xaçatryan istehza ilə əlavə edib: “Bəs sülh gündəliyi ilə bağlı nə yenilik var?” Onun sözlərinə görə, hakim “Vətəndaş müqaviləsi” partiyası ancaq tənqid etmək, təhqir yağdırmaq, günahlandırmaq və böhtan atmaqda mahirdir. “Yeddi ildir hakimiyyətdə olmağınıza baxmayaraq, mahiyyətiniz dəyişməyib – yenə də destruktiv və söyüş söyən müxalifət olaraq qalmısınız”, – o bildirib.

“Ermənistan indi subyekt deyil, obyektə çevrilib. Ölkə ilə bağlı qərarları Ankara, Bakı, strateji planda isə London verir. İndi problem təkcə Paşinyan deyil, dövlətin faktiki olaraq Türkiyə və Azərbaycan tərəfindən işğal edilməsindədir”, – öz növbəsində “Ermənistanın səsi” nəşri yazır.

“İşğalın məğzi nədədir? İşğal odur ki, sənin ölkəndə başqa dövlətin maraqları tam təmin edilir. İşğalın müxtəlif formaları olur: hərbi işğal zamanı küçələrdə türkiyəli və azərbaycanlı polis əməkdaşlarını görə bilərdik – bəlkə də türk, bəlkə də erməni mundirində. Onda, Ermənistan hökuməti və onun strukturları, məsələn, Daxili İşlər Nazirliyi kollaborasionist (satılmış – red.) hökumətin tərkib hissəsi sayılardı. Amma indi də faktiki olaraq belədir. Çünki Ermənistanın rəhbəri adlandırılan şəxs Türkiyə və Azərbaycanın maraqlarına xidmət edir. Bu ölkələr “İrəvan konstitusiyanı dəyişməlidir” tələbi ilə çıxış edən kimi, Paşinyan dərhal razılaşır”, – qəzet vurğulayır.

“Məntiqli nəticə: əgər Ermənistan işğal olunubsa, onda əsas taktiki qərarlar İrəvanda yox, Bakı və Ankarada qəbul olunur. Daha mühüm, geosiyasi əhəmiyyətə malik strateji qərarlar, məsələn, “Zəngəzur dəhlizi” ilə bağlı məsələlər Londonda müəyyənləşdirilir. Deməli, Ermənistanda hakimiyyət dəyişikliyi xalq üçün Bakı, Ankara və Londona qalib gəlmək qədər çətin məsələdir. Ermənistanda insanlar küçələrə çıxanda və hakimiyyət dəyişikliyi alınmayanda elə bilirik ki, Paşinyana uduzuruq. Halbuki, belə deyil”.

Nəşr qeyd edir: “Ermənistanda Paşinyan hakimiyyətinə qarşı dörd böyük etiraz dalğası olub, dörd dəfə polis həddindən artıq güc tətbiq edib və bütün bu hadisələrdə ABŞ Paşinyan rejimini və onun “demokratik islahatlarını” dəstəkləyib. İndi isə ABŞ-da administrasiya dəyişikliyi baş verib, hakimiyyətə Tramp gəlib. Hazırda ABŞ-da keyfiyyət dəyişikliyi baş verib, Ermənistanda “dərin dövlət”in digər qolu – Britaniya işləyir. Britaniya öz vassalları – Türkiyə və Azərbaycan vasitəsilə İrəvana nəzarət edir.

2021-ci ildə Ermənistanın yüksək rütbəli hərbçiləri Paşinyanın istefasını tələb edən bəyanat yaydılar. O vaxt Nikola ilk dəstək verən kim oldu? Doğrudur, Türkiyə. Ankara bəyan etdi ki, İrəvanda hakimiyyət hərbçilərin əlinə keçsə, sərt şəkildə müdaxilə edəcək – yalnız bəyanatla yox, əməli formada. Yəni, Paşinyanın hakimiyyətdə qalması Türkiyə üçün həyati əhəmiyyət daşıyırdı. Bu fakt onun hökumətinin kollaborasionist olduğunu sübut etmirmi?

Əgər Ermənistanda hakimiyyətə Britaniya, Türkiyə və Azərbaycanın maraqlarına uyğun hərəkət etməyən qüvvələr gəlsə, onların regiondakı planlarına ciddi zərbə vurulacaqmı? Vurulacaq, özü də necə. Onlar belə qüvvənin hakimiyyətə gəlməsinə imkan verməmək üçün əllərindən gələni edəcəklərmi? Cavab yenə də müsbətdir. Müxalifət bütün bunları anlamalı və olduqca ağıllı, düşünülmüş şəkildə hərəkət etməlidir”.

Bu kampaniyaya keçmiş xarici işlər naziri Vardan Oskanyan da qoşulub.

O, açıq şəkildə bildirib: “Bu gün hamımız yalnız bir hədəfə – Nikol Paşinyanı hakimiyyətdən uzaqlaşdırmağa köklənmişik və bu məqsədə necə nail olacağımızın üsulu artıq önəmli deyil.

Ermənistanın düşdüyü faciəli, fəlakətli və dəhşətli vəziyyət fonunda Paşinyanla bağlı istənilən fikir – onu satqınlıqda, dələduzluqda, səriştəsizlikdə və ya sadəlövhlükdə ittiham etmək – tamamilə başadüşüləndir və səslənmək haqqı var.

O, istəmədən, ancaq nadanlığı və səriştəsizliyi nəticəsində bu vəziyyəti yaradıb. Məncə, artıq özü də anlayır ki, erməni xalqını böyük bəlaya düçar edib və buna görə bağışlanmayacaq. Onun müharibədən sonra səhnəni tərk etmək əvəzinə, özünü haqq qazandırmaq mərhələsinə keçməsi və hər dəfə baş verənləri “yeni yanaşmalar” adı ilə izah etməyə çalışması qəbuledilməzdir.

Paşinyan bir sadə səbəbə görə istefa verməlidir: onun nə ölkəni idarə etmək imkanları qalıb, nə də hansısa xarici müttəfiqdən dəstək alır. O, öz rolunun məsuliyyətini dərk etmir, son yeddi ildə heç nə öyrənməyib, nə də inkişaf edib, psixoloji tarazsızlıq əlamətləri nümayiş etdirir. O, dinləməyi bacarmır, siyasət və diplomatiyada sözün çəkisini və əhəmiyyətini anlamır və nəticədə Ermənistanın təhlükəsizliyi, inkişafı, rifahı və milli birliyi üçün ciddi təhlükə yaradır.

Hazırda Paşinyanın hələ sülh yolu ilə hakimiyyətdən getmək imkanı var – səriştəsizliyini və hazırlıqsızlığını etiraf edərək, hüquqi məsuliyyətin labüdlüyünü anlayaraq. Müxalifət də bu variantı qəbul etməlidir. Çünki başqa bir ssenari “ölüm-dirim” dilemmasına çevriləcək, bu isə Paşinyanın hakimiyyəti qəsb etmək iştahasını artıracaq və daxili qarşıdurma ehtimalını yüksəldəcək”, – Oskanyan vurğulayıb.

Bütün bunların arxasında kimin dayandığı maraqlı deyilmi? Bəlkə, Moskva Ermənistana nəzarəti qaytarmaq üçün yeni mərhələyə start verib? Üstəlik, gələn il ölkədə parlament seçkiləri keçiriləcək, Ermənistan parlament respublikası olduğundan, “Vətəndaş müqaviləsi” partiyası seçkilərdə uduzsa, Paşinyan avtomatik vəzifəsini itirəcək. Yəqin, Rusiya mediasının da yazdığı kimi, Sergey Kiriyenkonun bu yaxınlarda Moskvanın Ermənistan üzrə yeni “kuratoru” təyin edilməsi heç təsadüfi deyil. Xatırladaq ki, Kiriyenko bundan əvvəl Ukraynanın işğal olunmuş ərazilərində Kremlin siyasətini müəyyən edirdi. Bütün bunlar necə qiymətləndirilə bilər? Ermənistan hakimiyyətinə qarşı hibrid müharibənin yeni mərhələsi?

Müstəqil politoloq Xəqani Cəfərli Pressklub.az-a açıqlamasında bununla bağlı fikirlərini bölüşüb.

O, qeyd edir ki, erməni müxalifətinin və KİV-lərinin Baş nazir Nikol Paşinyana qarşı yeni hücum dalğasında ümumi bir xətt hiss olunur.
“Bu onu göstərir ki, Paşinyan əleyhinə həmin hücumlarla Ermənistanda hakimiyyət-müxalifət münasibətlərini Rusiya ilə Böyük Britaniya rəqabəti kontekstində təqdim etməyə çalışırlar. Bu isə təsadüf deyil. Çünki əsrlərdir davam edən Rusiya–Britaniya rəqabəti hazırda ən gərgin dövrlərindən birini yaşayır. Moskvada hesab edirlər ki, Böyük Britaniya postsovet məkanında Rusiyanın təsirinin azalmasında mühüm rol oynayıb. Rusiyanın Azərbaycanla bağlı prinsipial mövqe sərgiləməsinin səbəblərindən biri də Bakı ilə London arasındakı əməkdaşlıqdır. Bu əməkdaşlıq Azərbaycanın iqtisadi, siyasi və hərbi gücünü artırıb, təhlükəsizliyini əhəmiyyətli dərəcədə təmin edib və Moskvanın təsirindən asılılığı xeyli azaldıb. Bunun nəticəsində Rusiya bütün Cənubi Qafqazda təsir imkanlarını itirməkdədir.

Eyni zamanda, Moskvada hesab edirlər ki, Ukraynanın müqavimətinin arxasında da məhz Britaniyanın iradəsi dayanır. Düzünü desək, Moskvanın bu qənaəti əsassız deyil. Məhz Böyük Britaniya Ukraynanın təcrid olunmasına imkan verməyib. Ukrayna Prezidenti Volodimir Zelenski Ağ Evdə məşhur qəbuldan sonra Britaniyada ən yüksək səviyyədə qarşılandı və bu, Londondan birmənalı siqnal olaraq, Putin və Trampın oyun qaydalarını pozdu”, – analitik baxışlarını bölüşüb.

O, bildirir ki, nəticə etibarilə, formalaşmaqda olan yeni dünya düzənində maraqları ən çox toqquşan iki ölkə var: “Böyük Britaniya və Rusiya. Paşinyanın opponentləri də bu vəziyyətdən istifadə etməyə çalışır, özlərini guya Rusiya maraqlarının təmsilçiləri kimi təqdim edib, Moskvanı radikal addımlar atmağa təhrik edirlər. Onlar vurğulayırlar ki, Paşinyanın hakimiyyətdə qalması Ermənistanı Britaniya təsir dairəsində saxlayacaq.

Rusiya Prezident Administrasiyası rəhbərinin birinci müavini Sergey Kiriyenkonun Ermənistanla münasibətləri koordinasiya etməyə başlaması isə Paşinyanın opponentləri üçün əlavə imkanlar yaradıb. Çünki Sergey Kiriyenkonun əsas vəzifəsi postsovet məkanında Rusiyanın təsir imkanlarının zəifləməsinin qarşısını almaq və rəqiblərinin mövqelərini sarsıtmaqdır. Paşinyanın rəqibləri də bu istiqamətdə Kiriyenkoya öz xidmətlərini təklif edir, Britaniyaya qarşı iddialar irəli sürürlər.

Ukraynaya qarşı işğalçı müharibədə ağır itkilər verməsinə baxmayaraq, Rusiya digər postsovet ölkələrinə qarşı hibrid müharibəni davam etdirir. Qarşıdakı aylarda vəziyyət daha da gərginləşəcək. Buna görə də bütün ölkələr qabaqlayıcı tədbirlər görməlidir. Əks halda, onlar Rusiyanın hibrid müharibəsinin ağır nəticələrinə hazır olmalıdırlar” –Xəqani Cəfərli yekunlaşdırıb.