Fransa gizli şəkildə Rusiyanın Belarus istiqamətindən irəliləyişini dəf etmək üçün Ukraynaya qoşun yeritmək ssenarisi üzərində məşq edib. “Intelligence Online”ın yaydığı məlumata əsasən, kod adı “Perseus” olan təlimlər ötən ilin payızında baş tutub və 10 gün davam edib. Onlara quru qoşunlarının (CAST) xüsusi əməliyyat bölmələri cəlb olunub. 3200 fransız əsgəri Kiyevin şimalında Dnepr çayının döngəsini xatırladan ərazidə təlim keçib. Onların taktikası 2022-ci ilin fevralında Rusiyanın hücumunu cilovlamağı bacaran Ukrayna Silahlı Qüvvələrinin təcrübəsinə əsaslanıb.

Komandanlıq əsas diqqət pilotsuz uçuş aparatlarının tətbiqi, elektron müharibə və kəşfiyyat, eləcə də yüksək gərginlikli döyüş şəraitində bölmələrin koordinasiyasının təmin edilməsinə yönəldilib. Nəşr yazır ki, eyni zamanda, təlimlərin bəzi iştirakçıları FPV dronlarının olmamasından narazı qalıblar və fransız istehsalçılarının belə modellərin hazırlanmasında geri qalmasından narahat olduqlarını bildiriblər.

Yanvarın 13-də Ukrayna Prezidenti Volodimir Zelenski Fransa Prezidenti Emmanuel Makronla təhlükəsizlik təminatları çərçivəsində ölkəyə Qərb qoşunlarının yerləşdirilməsi ideyasını müzakirə etdiyini bildirib.

“Biz onun həyata keçirilməsi, mümkün genişləndirilməsi və digər ölkələrin bu prosesə cəlb olunması üçün əməli addımları nəzərdən keçirdik”, - deyə Ukrayna lideri qeyd edib.

Bir neçə gün əvvəl Zelenski belə bir addımın Rusiyanı sülhə məcbur etmək üçün “ən yaxşı vasitələrdən biri” olacağını söyləyib.

Makron və onun hökumət rəsmiləri müxtəlif funksiyaları yerinə yetirmək üçün Ukraynaya hərbi kontingentin yerləşdirilməsinin mümkünlüyünə dəfələrlə eyham vurublar. Məsələn, Prezident deyib ki, fransız qoşunları ukraynalı döyüşçülərə təlim keçə və ya sülhməramlı kimi xidmət edə, atəşkəs razılaşması əldə edildikdən sonra onun saxlanmasına kömək edə bilər. Makron həmçinin Rusiya cəbhəni yararsa və Kiyev kömək istəyərsə, fransız əsgərlərinin Ukraynaya göndərilməsinə icazə verəcəyini bəyan edib.

Hərbi analitiklər Fransa qoşunlarının ölkənin Belarus və Moldovanın şərqindəki tanınmamış rusiyapərəst “Dnestryanı respublikası” ilə sərhədlərində ukraynalıları əvəz edə biləcəyini və beləliklə, azad edilmiş Ukrayna bölmələrinin aktiv döyüşlərin getdiyi bölgələrə gedə biləcəyini irəli sürürlər.

Makronun Qərb qoşunlarının Ukraynaya yeridilməsi təklifi Rusiyanın kəskin reaksiyasına səbəb olub. Prezident Vladimir Putin “potensial işğalçıları” nüvə silahı ilə hədələyib və deyib ki, “onlar ərazilərindəki hədəflərin vurula biləcəyini başa düşməlidirlər”.

Kremlin sözçüsü Dmitri Peskov isə bildirib ki, Ukrayna qoşunlarının təlimi ilə məşğul olan heç bir təlimatçının “toxunulmazlığı” yoxdur və “onların fransız olub-olmamasının fərqi yoxdur”.

Ayna.az