DİA.AZ: - Keçən günlərdə məlumat verərək bildirmişdik ki, Gəncədə bir müddət əvvəl baş verən qasırğa yerli məmurlar üçün əlavə qazanc yerinə çevrilib. Təsəvvür edin, dövlət büdcəsindən təbii fəlakətin fəsadlarının aradan qaldırılması üçün yetərincə pul ayrılsa da, deyəsən, Gəncə şəhər icra hakimiyyətin həmin vəsaiti xərcləmək fikrində deyil. diaaz.space-a daxil olan informasiyalardan belə aydın olur ki, fəlakətin fəsadlarını icra başçısı Elmar Vəliyev «yerli imkanlar» hesabına aradan qaldırmağı düşünür.
Bu barədə yaydığımız xəbərdə vurğulanırdı ki, birbaşa olaraq Elmar Vəliyevin tapşırığı ilə Gəncənin büdcə təşkilatlarında çalışanlardan, habelə gəncəli sahibkarlardan «fəlakət pulu» töycüsü yığılmaqdadır.
DİA.AZ-a daxil olan son informasiyada qeyd olunur ki, artıq qocaman Gəncəyə Ana Təbiətin vurduğu «yaraların üstü bağlansa da», icra hakimiyyəti adından «fəlakət pulu» yığımı dayanmaq bilmir ki, bilmir.
Mənbənin söylədikləri: «Ana Təbiət Gəncəyə qasırğanı bir dəfə yaşatdı, amma Elmar Vəliyev iki həftədir ki, Gəncədə qasırğa kimi kükrəyib «fəlakət pulu» yığır. Artıq canımız boğazımıza yığılıb. Biz bir qrup sahibkar Elmar Vəliyevin əlindən Azərbaycandan qaçmağı düşünürük».
İddialarla bağlı qarşı tərəfi də dinləməyə hazırıq…
