“Gələcəyini Qur!” təhsil təqaüdünü qazanmış abituriyentlərlə “Veysəloğlu Şirkətlər Qrupu”nda görüş keçirildi
25-11-2024, 17:44
24 noyabr 2024-cü il tarixində "Veysəloğlu Şirkətlər Qrupu"nun ofisində "Gələcəyini Qur!" layihəsinin builki iştirakçıları, o cümlədən şirkətin dəstəyi ilə təhsil təqaüdünü qazanmış 10 və 11-ci sinif şagirdlərinin iştirakı ilə görüş keçirilib. Qeyd edək ki, 2024-2025-ci tədris ilindən etibarən Şirkətlər Qrupu təhsilə dəstək ehtiyacı olan əməkdaşlarının övladlarının təhsil və inkişafına töhfə vermək məqsədilə onların "Gələcəyini Qur!" layihəsində iştirakına dəstək verir. Layihə çərçivəsində abituriyentlər bir il ərzində seçdikləri ixtisas qrupları üzrə ali məktəblərə qəbul olmaq üçün əlavə dərslərdə iştirak edir, inkişafetdirici tədbirlərdən və psixoloq dəstəyindən faydalanır.
Tədbirin əsas məqsədi abituriyentləri Şirkətlər Qrupunun fəaliyyəti ilə tanış etmək, onlara universitetə hazırlıq yolunda həvəs və motivasiya vermək olub. “Veysəloğlu Şirkətlər Qrupu”nun baş ofisinin tanışlığı ilə start götürən tədbirdə abituriyentlərin qarşısında Qrupun İnsan Resursları direktoru Ziya Rəcəbov abituriyentlərə Qrupun fəaliyyəti və keçdiyi yolun xronologiyası haqqında məlumat verib. Ardınca Veysəloğlu Distribusiya Təlim və İnkişaf şöbəsinin müdiri Ağamməd Günəşov və “Araz” Supermarketlər şəbəkəsinin İstedadların İdarə edilməsi və inkişafı şöbəsinin müdiri Zaur Məmmədli motivasiya yönümlü təlim proqramları ilə çıxış ediblər.
Tədbirin ikinci hissəsi “Gələcəyini Qur!” layihəsinin həmtəsisçisi Bəhruz Hidayətzadənin çıxışı ilə başlayıb. O, məktəblilərə layihənin məsuliyyət, elm, yaradıcı düşüncə və digər dəyərlərindən bəhs edib. Tədbirin davamında psixoloq və pedaqoq Hüseyn Həsənov “Məsuliyyətli olmaq” və “Gələcəyini Qur!” layihəsinin məzunu, Samir Qulamzadə isə “Hədəflərin təyin olunması” mövzusunda təqdimatlarla çıxış ediblər. Tədbir zamanı abituriyentlər interaktiv fəaliyyətdə iştirak edərək komandada işləmək, tənqidi düşüncə, kommunikasiya, problemlərin həll olunması kimi yumşaq bacarıqlarını inkişaf etmək üçün fürsət əldə etdilər. Tədbirin sonunda xatirə şəkli çəkilib və interaktiv fəaliyyətdə aktivlik göstərib seçilən layihə iştirakçıları şirkət tərəfindən kiçik hədiyyələrlə təltif olunub.
"DİA-AZ"
Geri qayıt