Rusiya vətəndaşlarının Azərbaycanda müvəqqəti olma müddəti azaldılıb. Bu barədə baş nazir Əli Əsədov qərar imzalayıb.
İndiyə qədər qüvvədə olan qaydaya görə, Rusiya vətəndaşları bir təqvim ili ərzində Azərbaycanda 180 gün qala bilərdi. Ancaq Azərbaycan baş nazirinin imzaladığı qərara əsasən, bu müddət 90 günə endirilib. Başqa sözlə, Rusiya vətəndaşlarının Azərbaycanda qalma müddəti yarıbayarı aşağı salınır. Qərar 2025-ci il yanvarın 1-dən qüvvəyə minir.

Bu, əlbəttə, Rusiya Federasiyasının daha əvvəl qəbul etdiyi qərara cavab olaraq atılmış addımdır.

Məlum olduğu kimi, Rusiya Federasiyasının Xarici İşlər Nazirliyinin rəsmi nümayəndəsi bir neçə gün bundan qabaq bildirmişdi ki, Rusiyanın qanunvericiliyinə dəyişikliklər olub. Həmin dəyişikliklərə görə, gələn il yanvarın 1-dən xarici ölkələrin vətəndaşlarının Rusiya ərazisində qalma müddəti bir təqvim ili ərzində cəmi 90 gün olacaq. Eyni zamanda Rusiya sərhədlərini keçən xarici ölkə vətəndaşı 7 iş günü ərzində olduğu yerdə qeydiyyata düşməlidir.

Daha əvvəl də Rusiya rəsmiləri də bəyan etmişdilər ki, miqrantların Rusiya ərazisinə axını məhdudlaşdırılacaq. Xüsusilə, Rusiya ərazisində baş vermiş terror aktlarından sonra bu qaydalar daha da sərtləşdirilib. Həmin terror aktlarında Mərkəzi Asiyadan olan miqrantlar günahlandırılıb.

Azərbaycana gəlincə, rəsmi Bakının qərarı da assimmetrikdir. Sadəcə, bir məsələ də var: Azərbaycana gələn Rusiya vətəndaşlarının çoxu Azərbaycan mənşəli, milliyyətcə Azərbaycanlı olan şəxslərdir. Bu şəxslərə istisnalar olacaqmı, ya yox? Bu, düşündürücü sualdır.

Seyid Əhmədli, Bizimyol.info