Gürcülərin diqqəti Ağ Evə yönəldi: həm iqtidar, həm müxalifətin Tramp ümidi
Bu gün, 00:45
Bu gün Gürcüstan Nazirlər Kabinetinin yeni ildə ilk iclasında ölkənin Baş naziri İrakli Kobaxidze vəzifəsinin icrasına başlayan ABŞ-ın yeni seçilmiş Prezidenti Donald Trampa hakim “Gürcü Arzusu – Demokratik Gürcüstan” Partiyasının iddia etdiyi “dərin dövlət üzərində qələbə” arzulayıb. “Gürcü Arzusu” iddia edir ki, Gürcüstanda geniş ictimaiyyətin qərbyönlü partiyalar və qeyri-hökumət təşkilatları ilə birlikdə yeni parlament seçkiləri tələb edən etirazçıların arxasında Amerika “dərin dövləti” dayanır. “Gürcü Arzusu” liderləri dəfələrlə ABŞ-da qondarma “dərin dövləti” tənqid edən Trampın “Amerika dərin dövlətinin Gürcüstanın daxili işlərinə müdaxiləsi” tendensiyasını dayandıracağına ümidlidir.
Baş nazir Kobaxidze bu gün iclasda vurğulayıb ki, Gürcüstan ABŞ-la münasibətlərə “təmiz səhifədən” başlamaq istəyir və bu istiqamətdə “əhəmiyyətli uğurların” olacağına ümid edir: “2025-ci il bu baxımdan çox vacib olacaq”.
Kobaxidze Trampın Ağ Evə qayıdışını Birləşmiş Ştatlar üçün “dönüş nöqtəsi” adlandırıb və deyib ki, onun “dərin dövlət”lə mübarizədəki uğuru “Gürcüstan-ABŞ münasibətlərinin normallaşması üçün həlledici olacaq”.
Xatırladaq ki, əvvəlki Co Baydenin administrasiyası Gürcüstan rəsmilərini demokratik prinsiplərdən yayınmaqda ittiham edərək onlara qarşı bir sıra sanksiyalar tətbiq etmişdi.
“Dərin dövlət” Trampın tərəfdarlarının əslində ictimai siyasətçilərin, ilk növbədə demokratların hərəkətlərini idarə etdiyini iddia etdikləri bürokratların və ictimai olmayan siyasi aktyorların konqlomeratı adlandırdıqları şeydir. Trampın əleyhdarları bu konsepsiyanı konspirasiya nəzəriyyəsi adlandırırlar.
Öz növbəsində, Prezident Trampın müttəfiqi, ABŞ Helsinki Komissiyasının rəhbəri, respublikaçı konqresmen Co Vilsonun dəvəti ilə ABŞ-da olan Gürcüstan müxalifət hərəkatının lideri, ölkənin beşinci Prezidenti Salome Zurabişvili bildirib ki, o, Donald Trampa Rusiya Prezidentinə Qafqazın “Qərb ölkələrinin maraq dairəsi” olduğunu xatırlatmağı tövsiyə edir.
Zurabişvili bu yaxınlarda bir neçə dəfə “Gürcü Arzusu” və onun rəhbərlərini “Kreml siyasətinin dirijorları” adlandırıb. O hesab edir ki, Tramp administrasiyası Gürcüstan hökumətinin Rusiya, İran və Çinlə münasibətləri ilə bağlı riskləri nəzərə almalıdır. Zurabişvili əks halda Amerikanın “Qafqaz regionunun mərkəzindəki strateji maraqlarını itirəcəyini” iddia edib.
“Qara dənizdə Çinə verilə biləcək böyük limanlarımız var. Gürcüstanda hazırda hakimiyyətdə olan de-fakto hökumət məhz bu planı həyata keçirir. Beləliklə, bu regionda ABŞ-ın maraqları ilə yanaşı, Avropanın da maraqları təhlükə altındadır”, - Zurabişvili bildirib.
Bu yaxınlarda Parisdə bərpa edilmiş Notr-Dam kilsəsinin açılış mərasimi zamanı Donald Tramp Fransa Prezidenti Emmanuel Makronun xahişi ilə Salome Zurabişvili ilə qısa görüş keçirib. Gürcüstanda hakimiyyət dəyişikliyini müdafiə edən dörd avropayönlü koalisiyanın liderləri Tramp və Zurabişvili arasında görüş faktını ABŞ-ın 47-ci Prezidentinin “Gürcü Arzusu”na qarşı mübarizədə Gürcüstanın demokratik qüvvələrinə dəstək verməyə hazır olmasının sübutu kimi görürlər.
Geri qayıt